• Shan Siva
• 22 Feb, 2025

கோலாலம்பூர், பிப் 22: கோலாலம்பூர்,  தித்தி வாங்சா எல்ஆர்டி ரயில் நிலையத்தில் இன்று காலை தண்டவாளத்தில் ஒருவர் இறந்து கிடந்தார்.

 இது தொடர்பாக காலை 8.38 மணிக்கு அவசர அழைப்பு பெற்றதாகவும், செந்துல் மற்றும் தித்திவாங்சா தீயணைப்பு மற்றும் மீட்பு நிலையங்களின் குழுக்கள் சம்பவ இடத்திற்கு அனுப்பப்பட்டதாகவும் கோலாலம்பூர் தீயணைப்பு மற்றும் மீட்புத் துறை  தெரிவித்துள்ளது.

பாதிக்கப்பட்டவர் சம்பவ இடத்திலேயே சுகாதார அமைச்சக அதிகாரிகளால் இறந்துவிட்டதாக உறுதிப்படுத்தப்பட்டது என்று ஓர் அறிக்கையில் கோலாலம்பூர் தீயணைப்பு மற்றும் மீட்புத் துறை தெரிவித்துள்ளது.

பார்வைக் குறைபாடுள்ளவர் என்று நம்பப்படும் அந்த நபர், சமநிலையை இழந்து தண்டவாளத்தில் விழுந்து ரயிலில் மோதியதாக முதற்கட்ட விசாரணையில் தெரியவந்துள்ளது என்று அந்தத் துறை தெரிவித்துள்ளது.

விபத்து நடந்த நேரத்திலிருந்து ரயில்வே செயல்பாட்டு பதிவுகளை மதிப்பாய்வு செய்வது உட்பட, சம்பவத்திற்கான சரியான காரணத்தைக் கண்டறிய அதிகாரிகள் மேலும் விசாரணைகளை மேற்கொண்டு வருவதாகத் தெரிவிக்கப்பட்டுள்ளது.

சம்பவத்தைத் தொடர்ந்து, PWTC, தித்தி வாங்சா, செந்துல் மற்றும் செந்துல் திமோர் எல்ஆர்டி நிலையங்களில் ரயில் சேவைகள் தற்காலிகமாக நிறுத்தி வைக்கப்பட்டுள்ளதாக ரேபிட் ரெயில் ஒரு தனி அறிக்கையில் அறிவித்துள்ளது.

பாதுகாப்பு முன்னெச்சரிக்கையாக, சம்பவ இடத்தில் காவல்துறை, தீயணைப்பு மற்றும் மீட்புத் துறை மற்றும் ஆம்புலன்ஸ் பணியாளர்களின் அவசர நடவடிக்கைகளை எளிதாக்கும் வகையில் நிலையத்தில் மின்சாரம் துண்டிக்கப்பட்டுள்ளது.

பாதிக்கப்பட்ட பயணிகளுக்கு உதவ இலவச ஷட்டில் பேருந்துகள் உட்பட மாற்று போக்குவரத்து சேவைகள் செயல்படுத்தப்பட்டுள்ளன என்று அது கூறியது!