• Shan Siva
• 27 Feb, 2025

புத்ராஜெயா, பிப் 27: உள்ளூர் சந்தையில் போதுமான தேங்காய் விநியோகத்தை உறுதி செய்வதற்காக, வேளாண்மை மற்றும் உணவுப் பாதுகாப்பு அமைச்சகம் (KPKM) 661 டன்களுக்கு சமமான 661,761 தேங்காய்களை இறக்குமதி செய்து விநியோகித்துள்ளது. இதன் மொத்த மதிப்பு RM1.45 மில்லியன் ஆகும்.

KPKM இன் கூற்றுப்படி, சிலாங்கூரில் உள்ள டெங்கில் FAMA (மத்திய வேளாண் சந்தைப்படுத்தல் ஆணையம்) செயல்பாட்டு மையம்; நெகிரி செம்பிலானில் உள்ள செனாவாங் FAMA செயல்பாட்டு மையம்; மற்றும் பேராக்கில் உள்ள சிம்பாங் பூலாய் FAMA செயல்பாட்டு மையம் போன்ற முக்கிய விநியோக மையங்களில் தேங்காய் விநியோகம் செய்யப்பட்டுள்ளது.

பின்னர் இந்த விநியோகம் நாடு தழுவிய 42 FAMA மையங்கள் மூலம் அனுப்பப்பட்டு, சந்தையில் தேங்காய் கிடைப்பதை உறுதி செய்வதற்காக FAMA சில்லறை விற்பனை நிலையங்கள் மற்றும் முக்கிய மொத்த விற்பனையாளர்களுக்கு விற்பனை செய்யப்படும் என்று அது இன்று ஓர் அறிக்கையில் தெரிவித்துள்ளது.

உள்நாட்டு தேங்காய் விநியோகம் நிலைத்தன்மைக்குத் திரும்பும் வரை இந்த முயற்சி தொடரும். மலேசியாவிற்குத் தேங்காய்களை ஏற்றுமதி செய்யும் நாடுகளில் இந்தோனேசியா, தாய்லாந்து மற்றும் இலங்கை ஆகியவை அடங்கும் என்று தெரிவிக்கப்பட்டுள்ளது.

 நீண்டகால நடவடிக்கையாக, 12வது மலேசியா திட்டத்தின் கீழ், வேளாண் துறை (DOA) தென்னை மரங்களை மீண்டும் நடுதல் மற்றும் புதிதாக நடுதல் உள்ளிட்ட பல முயற்சிகளை செயல்படுத்தியுள்ளது.

உள்நாட்டு விநியோகத்தை அதிகரிக்க மாநில அரசாங்கத்தின் ஒத்துழைப்புடன் அடையாளம் காணப்பட்ட நிலம் தேங்காய் சாகுபடிக்கு பயன்படுத்தப்படும் என்றும் KPKM அறிவித்தது.