ரக்பி பயிற்சியின்போது மயங்கி விழுந்த 14 வயது சிறுவன் மரணம்! மலாக்காவில் நிகழ்ந்த சோகம்
- Shan Siva
- 25 Jun, 2026
மலாக்கா, ஜூன் 24: நேற்று தனது பள்ளியில் ரக்பி பயிற்சியின் போது மயங்கி விழுந்த இரண்டாம் படிவ மாணவர் ஒருவர் உயிரிழந்தார்.
மாலை 6 மணிக்கு நடந்த இந்தச் சம்பவத்தில், பயிற்சி சிறிது நேரம் இடைவேளைக்காக நிறுத்தப்பட்ட பிறகு, பயிற்சியாளரின் விளக்கத்தைக் கேட்டுக் கொண்டிருந்தபோது 14 வயது மாணவர் திடீரென மயங்கி விழுந்ததாக நம்பப்படுகிறது.
உயிரிழந்தவரின் பெரிய மாமாவான 64 வயது யஹ்யா எண்டுட், சிறுவயதிலிருந்தே தான் கவனித்து வந்த அந்தச் சிறுவன், பள்ளி விடுதியில் தங்கியிருந்ததாகவும், அவனுக்கு இதுவரை எந்த உடல்நலப் பிரச்சினைகளும் இருந்ததில்லை என்றும் கூறினார்.
பாதிக்கப்பட்டவர் தனது நண்பர்களுடன் ஓய்வெடுப்பதற்கு முன்பு, சுமார் 15 நிமிடப் பயிற்சியை முடித்திருந்ததாக தனக்குத் தெரிவிக்கப்பட்டது என்று அவர் கூறினார்.
பயிற்சியாளர் விளக்கமளித்துக் கொண்டிருந்தபோது, அமர்ந்திருந்த அவர் திடீரென மயங்கி விழுந்து மூச்சுவிடச் சிரமப்பட்டார் என்று நேற்று இரவு மலாக்கா மருத்துவமனையில் யஹ்யா கூறினார்.
பாதிக்கப்பட்டவருக்கு இதற்கு முன் எந்த நோயும் இருந்ததில்லை என்றும், உடல்நிலை சரியில்லை என்று அவர் ஒருபோதும் புகார் கூறியதில்லை என்றும், அதனால் தான் இன்னும் அதிர்ச்சியில் இருப்பதாகவும் அவர் கூறினார்.
இதற்கிடையில், மாநிலக் கல்வி, உயர் கல்வி மற்றும் மத விவகாரங்களுக்கான குழுவின் தலைவர் டத்தோ ரஹ்மத் மரிமான் இந்தச் சம்பவத்தை உறுதிப்படுத்தினார்.
பாதிக்கப்பட்டவர் தெலோக் மாஸில் உள்ள ஒரு பள்ளியைச் சேர்ந்த ஆண் மாணவர். ரக்பி பயிற்சிக்குப் பிறகு நடந்த விளக்கக் கூட்டத்தின்போது அவர் மயங்கி விழுந்ததாகவும், பின்னர் அவர் இறந்துவிட்டதாக உறுதி செய்யப்பட்டதாகவும் நம்பப்படுகிறது.
மேலதிக நடவடிக்கைக்காக சடலம் மலாக்கா மருத்துவமனையின் தடயவியல் துறைக்கு அனுப்பப்பட்டுள்ளது என்று ரஹ்மத் கூறினார்!
Leave a Reply
Your email address will not be published. Required fields are marked *
தேடல்
செய்தி வகை
