• Shan Siva
• 15 Jan, 2025

கோலாலம்பூர், ஜன 15: தெளிவான மற்றும் குறிப்பிட்ட வழிகாட்டுதல்களை உறுதி செய்வதற்காக, காவல்துறையினர் ஒருவரின் மொபைல் போனை பரிசோதிக்க அனுமதிக்கும் தற்போதைய சட்டங்களை மறுபரிசீலனை செய்ய வேண்டும் என்று சமூக ஆர்வலரும் முன்னாள் எம்.பி.யுமான லீ லாம் தை கேட்டுக்கொண்டுள்ளார்.

இந்த வழிகாட்டுதல்கள், ஒரு நபரின் மொபைல் போனை காவல்துறை அணுகுவதற்கு உத்தரவாதம் அளிக்கும் குற்றங்களின் வகைகள், இதில் உள்ளடங்க வேண்டிய குறிப்பிட்ட நடைமுறைகள் மற்றும் நீதித்துறை மேற்பார்வை ஆகியவற்றை தெளிவாகக் குறிப்பிட வேண்டும் என்று கூறினார்.

காவல்துறையினரால் அதிகார துஷ்பிரயோகம் செய்யப்படுவதைத் தடுக்க, தற்போதுள்ள சட்ட விதிகளில் உள்ள ஓட்டைகளை அடைப்பது மிகவும் முக்கியமானது என்று லீ கூறினார.

சில ஐரோப்பிய நாடுகளில் தெளிவான மற்றும் துல்லியமான சட்டங்கள் உள்ளன, அவை காவல்துறையினர் மொபைல் போன் தரவை அணுகுவதற்கு முன்பு வாரண்ட் மற்றும் குற்றச் செயல்களின் சந்தேகத்தை கோருகின்றன. அவற்றின் முறைகளை நாம் படிக்கலாம் என்று அவர் குறிப்பிட்டார்.

நேற்று, காவல்துறைத் தலைவர் ரசாருதீன் ஹுசைன், ஒரு நபர் குற்றம் செய்ததாக சந்தேகம் அல்லது தகவல் இருந்தால், அவரது மொபைல் போனைச் சரிபார்க்க காவல்துறைக்கு அதிகாரம் உள்ளது என்று கூறியது குறிப்பிடத்தக்கது.

 குற்றவியல் நடைமுறைச் சட்டம் மற்றும் தகவல் தொடர்பு மற்றும் மல்டிமீடியா சட்டம், ஒரு நபரின் மொபைல் போனைச் சரிபார்க்க காவல்துறைக்கு அதிகாரம் அளித்துள்ளது என்று ரசாருதீன் கூறினார்.

இருப்பினும், இன்ஸ்பெக்டர் அல்லது அதற்கு மேற்பட்ட பதவியில் உள்ள காவல்துறை அதிகாரிகள் மட்டுமே அவ்வாறு செய்ய அதிகாரம் பெற்றுள்ளனர் என்றார்.

இதனை அடுத்து லீ இவ்வாறு கூறினார். சட்ட அமலாக்கத்தை சமநிலைப்படுத்துவதன் முக்கியத்துவத்தையும் ஒரு நபரின் தனியுரிமையை உறுதி செய்வதன் முக்கியத்துவத்தையும் மீண்டும் வலியுறுத்தி, இந்த விதிகளில் உள்ள இடைவெளிகள் துஷ்பிரயோகம் செய்யக்கூடிய சாத்தியக்கூறுகள் எப்போதும் இருப்பதாக லீ கூறினார்.