கோத்தா கினபாலு, மார்ச் 2-
சபா மாநிலத்தில் ஏற்பட்டுள்ள வெள்ளப் பாதிப்பின் காரணமாக 182 குடும்பங்களைச் சேர்ந்த மொத்தம் 483 பேர் இன்று காலை 8 மணி நிலவரப்படி இன்னும் தற்காலிக மையத்தில் தங்க வைக்கப்பட்டுள்ளனர்.
சபா மாநில பேரிடர் மேலாண்மை செயலாளர் வெளியிட்ட அறிக்கையில், நேற்று இரவு 8 மணி நிலவரப்படி 172 குடும்பங்களைச் சேர்ந்த 557 பேர் பதிவு செய்யப்பட்டிருந்த நிலையில், தற்போது அந்த எண்ணிக்கை குறைந்துள்ளதாகத் தெரிவிக்கப்பட்டுள்ளது.
“பியூபோர்ட் பகுதியில் உள்ள 93 கிராமங்களைச் சேர்ந்த அனைத்து பாதிக்கப்பட்டவர்களும் பனீர் சட்டமன்ற மண்டபத்தில் அமைக்கப்பட்ட தற்காலிக மையத்தில் தங்க வைக்கப்பட்டுள்ளனர்,” என்று அந்த அறிக்கையில் குறிப்பிடப்பட்டுள்ளது.
மாநில அதிகாரிகள் பாதிக்கப்பட்ட மக்களின் பாதுகாப்பு, உணவு, குடிநீர் மற்றும் பிற அத்தியாவசிய தேவைகள் முறையாக வழங்கப்படுகின்றனவா என்பதை தொடர்ந்து கண்காணித்து வருகின்றனர்.
இதற்கிடையில், மலேசிய வானிலை ஆய்வு துறை இன்று காலை சபா மாநிலத்தில் மழை பெய்ய வாய்ப்பு இல்லை என தெரிவித்துள்ளது. எனினும், உள்நாட்டு பகுதிகளில் பிற்பகல் மற்றும் இரவு நேரங்களில் இடியுடன் கூடிய மழை மற்றும் பலத்த காற்று வீசக்கூடும் என முன்னறிவிப்பு வெளியிடப்பட்டுள்ளது.
வெள்ளம் ஏற்படக்கூடிய பகுதிகளில் வசிக்கும் மக்கள் எச்சரிக்கையுடன் இருந்து, அதிகாரிகள் வழங்கும் அறிவுறுத்தல்களை கடைப்பிடிக்குமாறு கேட்டுக் கொள்ளப்பட்டுள்ளனர்.
