விண்வெளியில் ஜேம்ஸ் வெப் தொலைநோக்கி கண்டறிந்த 'ஜெல்லி பிஷ்' கேலக்ஸி!
- Muthu Kumar
- 24 Feb, 2026
அண்டவெளியின் ஆழமான பகுதிகளில் ஆய்வு மேற்கொண்டபோது, COSMOS2020-635829 என்று பெயரிடப்பட்டுள்ள விசித்திரமான விண்மீன் மண்டலத்தை விஞ்ஞானிகள் கவனித்துள்ளனர்.இது கடலில் மிதக்கும் ஜெல்லி பிஷ் மீனின் நீண்ட உணர்நீட்சிகளைப் (Tentacles) போலவே, விண்வெளியில் ஒளிரும் வால் போன்ற பகுதிகளைப் பின்னால் இழுத்துச் செல்கிறது.
ஒரு விண்மீன் மண்டலம் விண்வெளியில் உள்ள அடர்த்தியான வாயு மண்டலத்தின் வழியாக மிக வேகமாகப் பயணிக்கும்போது, சுற்றியுள்ள அழுத்தம் அந்த மண்டலத்தின் உள்ளே இருக்கும் வாயுக்களைப் பின்னோக்கித் தள்ளுகிறது. 'ரேம்-பிரஷர் ஸ்ட்ரிப்பிங்' (Ram-pressure stripping) எனப்படும் இந்த செயலால், விண்மீன் மண்டலத்தின் வாயுக்கள் பிரிக்கப்பட்டு நீண்ட வால் போன்ற அமைப்பாக மாறுகின்றன. இதுவே அந்த மண்டலத்திற்கு ஜெல்லி பிஷ் போன்ற தோற்றத்தைத் தருகிறது.
பூமியிலிருந்து சுமார் 8.5 பில்லியன் ஒளி ஆண்டுகள் தொலைவில் உள்ள இந்த மண்டலத்தைக் கண்டறிவது எளிதல்ல. ஆனால், ஜேம்ஸ் வெப் தொலைநோக்கியின் அகச்சிவப்பு கதிர்களை (Infrared) உணரும் திறன், பிரபஞ்ச தூசுகளையும் தாண்டி பல பில்லியன் ஆண்டுகளுக்கு முந்தைய காட்சியை நமக்குக் காட்டுகிறது. அதாவது, பிரபஞ்சத்தின் தற்போதைய வயதில் பாதியை விடக் குறைவான காலத்தில் (5.3 பில்லியன் வயது இருந்தபோது) இந்த மண்டலம் எப்படி இருந்ததோ, அந்த பிம்பத்தை இப்போது நாம் காண்கிறோம்.
இந்தக் கண்டுபிடிப்பில் வியக்கத்தக்க விஷயம் என்னவென்றால், அந்த ஜெல்லி பிஷ் போன்ற "உணர்நீட்சிகளில்" புதிய விண்மீன்கள் உருவாகி வருகின்றன. பொதுவாக, விண்மீன் மண்டலத்திலிருந்து வாயுக்கள் வெளியேற்றப்பட்டால் அது அழிவை நோக்கியே செல்லும். ஆனால், இங்கே வெளியேற்றப்பட்ட வாயுக்களுக்குள்ளேயே புதிய நட்சத்திரங்கள் உருவாவதை விஞ்ஞானிகள் கண்டறிந்துள்ளனர்.
இந்தக் "காஸ்மிக் ஜெல்லி பிஷ்" வெறும் அழகான காட்சி மட்டுமல்ல; இது பிரபஞ்சம் எப்படி உருமாற்றம் அடைந்தது என்பதற்கான ஒரு முக்கிய ஆதாரமாகும். ஒரு விண்மீன் மண்டலம் எப்படி வளர்ச்சியை அடைகிறது, எப்படித் தனது எரிபொருளான வாயுக்களை இழக்கிறது என்பதைப் புரிந்துகொள்ள இது உதவும். வானியலாளர்கள் தொடர்ந்து ஜேம்ஸ் வெப் அளிக்கும் தரவுகளைக் கொண்டு, இந்த விண்மீன் உருவாவதற்கான வேகம் மற்றும் அந்த வால்களில் நடக்கும் மாற்றங்கள் குறித்து ஆய்வு செய்து வருகின்றனர்.
Leave a Reply
Your email address will not be published. Required fields are marked *
தேடல்
செய்தி வகை
