பெர்சாத்து மீது ஒழுங்கு நடவடிக்கை!
- Shan Siva
- 26 Oct, 2026
கோலாலம்பூர், அக் 26: பெரிக்காத்தான் நேஷனல் கூட்டணியின் அரசியலமைப்பை மீறியதாகக் கூறி, பெர்சாத்து கட்சி மீது ஒழுங்கு நடவடிக்கை எடுக்கப்படும் என்று கூட்டணியின் பொதுச் செயலாளர் தக்கியுதீன் ஹசான் தெரிவித்துள்ளார்.
கோலாலம்பூரில் உள்ள பாஸ் கட்சியின் தலைமையகத்தில் நேற்று நடைபெற்ற பெரிக்காத்தான் நேஷனல் உச்சமன்றக் கூட்டத்திற்குப் பிறகு செய்தியாளர்களிடம் பேசிய அவர் இதனைத் தெரிவித்தார்.
நெகிரி செம்பிலான் மாநிலத் தேர்தலில் பெரிக்காத்தான் நேஷனல் கூட்டணியை எதிர்த்து பெர்சாத்து போட்டியிட்டது உள்ளிட்ட, கூட்டணியின் அரசியலமைப்பை மீறியதாகக் கூறப்படும் விவகாரங்கள் குறித்து இந்தக் கூட்டத்தில் முடிவு எடுக்கப்பட்டதாக அவர் கூறினார்.
கூட்டணியின் அரசியலமைப்பில் உள்ள 15-வது பிரிவின்படி, கூட்டணியின் உறுப்புக் கட்சிகள் மீது நடவடிக்கை எடுக்க முடியும் என்றும் அவர் தெரிவித்தார்.
பெர்சாத்து கட்சிக்கு எதிரான குற்றச்சாட்டுகள் முறைப்படி தயாரிக்கப்படும் என்றும், அதற்குப் பதிலளிக்க அக்கட்சிக்குப் போதிய கால அவகாசம் வழங்கப்படும் என்றும் தக்கியுதீன் கூறினார்.
குற்றச்சாட்டுகளின் தீவிரத்தைப் பொறுத்து எச்சரிக்கை விடுப்பது, கட்சியை இடைநீக்கம் செய்வது அல்லது கூட்டணியிலிருந்து நீக்குவது உள்ளிட்ட நடவடிக்கைகள் எடுக்கப்படலாம் என்றும் அவர் தெரிவித்தார்.
கூட்டணியின் நலன்களுக்கு எதிராக பெர்சாத்து மேற்கொண்டதாகக் கூறப்படும் பல்வேறு நடவடிக்கைகள் ஆய்வு செய்யப்பட்ட பின்னரே, இறுதிக் குற்றச்சாட்டுகள் முடிவு செய்யப்படும் என்றும் அவர் கூறினார்.
இதற்கிடையே, நவம்பர் 14-ஆம் தேதி நடைபெறவுள்ள மலாக்கா மாநிலத் தேர்தலில் பெரிக்காத்தான் நேஷனல் கூட்டணியின் சின்னத்திலேயே போட்டியிட முடிவு செய்யப்பட்டுள்ளதாக தக்கியுதீன் தெரிவித்தார்.
மேலும், அக்டோபர் 29-ஆம் தேதி வேட்பாளர்கள் அறிவிக்கப்படுவார்கள் என்றும், போட்டியிடும் தொகுதிகளின் எண்ணிக்கையும் வேட்பாளர் பட்டியலும் இன்னும் இறுதி செய்யப்படவில்லை என்றும் அவர் கூறினார்!
Leave a Reply
Your email address will not be published. Required fields are marked *
தேடல்
செய்தி வகை
