சத்தீஸ் முனியாண்டிக்கு RM 3000 சிவநேசன் செலுத்த வேண்டும்! நீதிமன்றம் உத்தரவு

Shan Siva
10 Sep, 2026

தாப்பா, செப் 10: பேராக் மாநில நிர்வாகக் குழு உறுப்பினர் ஏ. சிவநேசன், பாகான் டாலாம் தொகுதியின் முன்னாள் சட்டமன்ற உறுப்பினர் சத்தீஸ் முனியாண்டிக்கு வழக்குச் செலவுத் தொகையாக RM3,000 செலுத்த வேண்டும் என்று உயர் நீதிமன்றம் இன்று உத்தரவிட்டது.

சிவநேசன் தொடர்ந்த அவதூறு வழக்கை பட்டர்வொர்த் அமர்வு நீதிமன்றத்திற்கு (Sessions Court) மாற்றக் கோரி சத்தீஸ் தாக்கல் செய்த மனுவை ஏற்றுக்கொண்ட நீதித்துறை ஆணையர் ஜமான் முகமது நூர் இந்த உத்தரவைப் பிறப்பித்தார்.

பேராக் மாநிலத்தில் இந்தியச் சமூகம் மற்றும் இந்து மத விவகாரங்களைக் கவனித்து வரும் சிவநேசன், கடந்த ஆண்டு ஜூன் 8 அன்று பதிவேற்றப்பட்ட டிக்டாக் (TikTok) காணொளி ஒன்று அவதூறானது என்று கூறி சத்தீஸ் மீது வழக்கு தொடர்ந்தார்.

டிசம்பர் 1-ஆம் தேதியிட்ட தனது வழக்கு மனுவில், அந்தக் காணொளி தன்னை பொதுப் பதவியை வகிக்கத் தகுதியற்றவர் போலச் சித்தரிப்பதாகவும், தன்னை விவரிக்க 'குடிகாரன்' (kudikare) என்ற தமிழ் வார்த்தையை சத்தீஸ் பயன்படுத்தியதாகவும் சிவநேசன் குற்றம் சாட்டினார்.

அவதூறு கருத்துகள் அடங்கிய அந்தப் பதிவை மேலும் வெளியிடுவதைத் தடுக்கத் தடை உத்தரவு, காணொளியை நீக்குதல், இழப்பீடு கோருதல் மற்றும் மூன்று தமிழ் நாளிதழ்களின் முதல் பக்கத்தில் மறுப்பு மற்றும் மன்னிப்பு கோருதல் ஆகியவற்றை சிவநேசன் கோரியிருந்தார்.

ஜனவரி 19-ஆம் தேதியிட்ட தனது தற்காப்பு வாதத்தில், அரசு நிலத்தில் புதிய இந்து ஆலயங்கள் அமைப்பதற்கான அனுமதியை ஐந்து ஆண்டுகளுக்கு நிறுத்தி வைப்பதாகக் கூறப்பட்ட பேராக் மாநில அரசின் சுற்றறிக்கை தொடர்பான சர்ச்சையைத் தொடர்ந்தே தான் அந்தக் காணொளியைப் பதிவேற்றியதாக சத்தீஸ் தெரிவித்தார்.

விமர்சனங்களைத் தொடர்ந்து அந்த நடவடிக்கை பின்னர் ரத்து செய்யப்பட்டதாகக் கூறிய அவர், தான் 'கியாசன்' (kiasan) எனப்படும் உருவக மொழியையே பயன்படுத்தியதாகவும், தனது கருத்துகள் சிவநேசனை நேரடியாகக் குறிவைக்கவில்லை என்றும் வாதிட்டார்!

Your email address will not be published. Required fields are marked *

முக்கிய செய்தி