• Shan Siva
• 16 Jan, 2026

கோலாலம்பூர், ஜான் 16: கட்சி முன்பு கடுமையாக எதிர்த்திருந்த டிஏபி (DAP) உடன் தற்போது இணைந்து செயல்படுவது “அல்லாஹ்வின் விருப்பம்” என அம்னோ தலைவர் டத்தோஸ்ரீ அஹ்மத் ஜாஹித் ஹமிடி தெரிவித்துள்ளார். பக்காத்தான் ஹரப்பான் (PH) கூட்டணியின் ஒரு பகுதியாக இருக்கும் டிஏபியுடன் ஒருபோதும் இணங்கக் கூடாது என்று அம்னோ தீர்மானித்திருந்ததிலிருந்து நான்கு ஆண்டுகளுக்குப் பிறகு, இந்தக் கருத்தை அவர் வெளியிட்டுள்ளார்.

அம்னோவின் தற்போதைய நிலைப்பாடு அரசியல் நிலைத்தன்மையை உறுதி செய்யும் நடைமுறை அணுகுமுறையின் விளைவாக உருவானது என ஜாஹிட் விளக்கினார்.

ஒருகாலத்தில் ‘No Anwar, No DAP’ என்று நான் உறுதிமொழி எடுத்திருந்தேன். அதற்குப் பிறகும், டிஏபியுடன் எனக்கு எந்தப் பிரச்சினையும் இல்லை என்று அவர் கூறினார்.
2022 பொதுத் தேர்தலுக்கு முன்னர் அவர் பயன்படுத்திய அந்த வாசகத்தை நினைவூட்டிய அவர், ஆனால் அல்லாஹ்விற்கு வேறு திட்டங்கள் இருந்தன. இன்றைய அரசில் நாங்கள் கூட்டாளிகளாக இருப்பது விதியாகிவிட்டது என்று கூறினார்.

அம்னோவின் சில உறுப்பினர்கள் டிஏபி மீது அதிருப்தி கொண்டுள்ளதாக கூறப்படும் குற்றச்சாட்டுகளையும் ஜாஹிண்ட் நிராகரித்தார். டிஏபியுடன் தன்னிடம் நல்ல உறவு இருப்பதாகவும், மகோத்தா இடைத்தேர்தலில்  அம்னோ வெற்றிபெற டிஏபி பெரும் பங்காற்றியதாகவும் அவர் கூறினார்.

அவர்களின் ஆதரவால் அம்னோ  வேட்பாளர் சுமார் 20,000 வாக்குகள் பெரும்பான்மையில் வெற்றி பெற்றார் என ஜாஹிட் தெரிவித்தார்.
2024-ல் நடைபெற்ற மகோத்தா சட்டமன்றத் தொகுதி தேர்தலில், பாரிசான் நேஷனல் (BN) சார்பில் போட்டியிட்ட சைட் ஹுசேன் சைட் அப்துல்லா, 20,648 வாக்குகள் பெரும்பான்மையில் வெற்றி பெற்றார். இது, 2022 மாநிலத் தேர்தலில் BN பெற்ற 5,166 வாக்குகள் பெரும்பான்மையை விட நான்கு மடங்கு அதிகமாகும்.

டிஏபியுடன் அம்னோவின் உறவுகள் குறித்து ஜாஹிட் கருத்து தெரிவித்தது, அம்னோ இளைஞர் பிரிவுத் தலைவர் டாக்டர் அக்மல் சாலே  பக்காத்தான் ஹரப்பானையும், குறிப்பாக டிஏபியையும் கடுமையாக விமர்சித்து வரும் சூழலில் வெளியாகியுள்ளது.
ஜனவரி 3 அன்று நடைபெற்ற சிறப்பு மாநாட்டில், இஸ்லாம், மலாய் சமூகத்தின் உரிமைகள் மற்றும் அரசமைப்புச் சாசன அரசமைப்பான மன்னராட்சி தொடர்பான “சிவப்பு கோடுகள்” மீறப்பட்டதாகக் கூறி, ஒற்றுமை அரசிலிருந்து அம்னோ விலக வேண்டும் என அக்மல் வலியுறுத்தியிருந்தார்.

இதற்கு பதிலளித்த ஜாஹிட், டிஏபி அரசில் இருப்பதால் மலாய் மற்றும் முஸ்லிம் மக்களின் நலன்கள் புறக்கணிக்கப்படவில்லை எனத் தெளிவுபடுத்தினார்.
டிஏபி, மத்திய அரசமைப்புச் சட்டத்தை மதிப்பதாகவும், மலாய் மொழி நாட்டின் அதிகாரப்பூர்வ மொழி என்றும், இஸ்லாம் அதிகாரப்பூர்வ மதம் என்றும் ஏற்றுக்கொண்டுள்ளதாகவும் அவர் கூறினார்.

இப்போது அவர்கள் மலாய்காரர்கள்  மற்றும் பூமிபுத்ரா மக்களின் உரிமைகளைக் கேள்விக்குள்ளாக்குவதில்லை என்றும் ஜாஹிட் தெரிவித்தார்.

2018 முதல் அம்னோ தலைவராக இருந்து வரும் ஜாஹித், மலேசியாவின் அரசியல் சூழல் மாறியுள்ளதாகவும், நாட்டின் நலனுக்காக கட்சிகள் இணைந்து செயல்பட வேண்டிய கட்டாயம் ஏற்பட்டுள்ளதாகவும் கூறினார்.
ஒருகாலத்தில் ஒரே மேசையில் அமர்வதே சாத்தியமற்றதாக இருந்த அம்னோ மற்றும் டிஏபி, இப்போது நாட்டின் அரசியல் நிலைத்தன்மைக்காக ஒன்றிணைந்து செயல்பட முடிகிறது என அவர் விளக்கினார்.

அரசின் நிலைத்தன்மை வெளிநாட்டு அரசுகளிடையே நம்பிக்கையை மீட்டெடுத்துள்ளதாகவும், 2018-ல் பாரிசான் நேஷனல் தோல்வியடைந்த பின்னர் ஏற்பட்ட அரசியல் குழப்ப நிலைக்கு நாடு மீண்டும் செல்லாமல் தடுக்க உதவியுள்ளதாகவும் ஜாஹிட் கூறினார்.

மக்கள் அத்தகைய நிலை மீண்டும் நிகழ வேண்டுமென்று விரும்பமாட்டார்கள். 2018-க்குப் பிறகு மூன்று வெவ்வேறு அரசுகளின் கீழ் வாழ்ந்த அனுபவம் மக்களுக்கு கசப்பானதாக இருந்தது என்று அவர் கூறினார்.

அந்த காலகட்டத்தில், டாக்டர் மகாதீர் முகமது, தன்ஸ்ரீ முகைதீன் யாசின் மற்றும் டத்தோஸ்ரீ ஸ்ரீ இஸ்மாயில் சப்ரி யாக்கோப் ஆகியோர் மூன்று ஆண்டுகளுக்குள் பிரதமர்களாக நியமிக்கப்பட்டதை அவர் குறிப்பிட்டார்!