தொழுகையின் போது மாணவியின் கைப்பையைத் திருடிய ஆசாமி! போலிஸ் வலைவீச்சு

Shan Siva
08 Jun, 2026

அலோர் காஜா, ஜூன் 8: கடந்த சனிக்கிழமை, ஜூன் 6 அன்று அலோர் காஜா, கம்போங் ஜெலாத்தாங்கில் உள்ள ஒரு மசூதியின் பெண்கள் தொழுகைப் பகுதியில், பல்கலைக்கழக மாணவி ஒருவர் தொழுகையில் ஈடுபட்டிருந்தபோது, அவரிடமிருந்து கைப்பையைத் திருடியதாகச் சந்தேகிக்கப்படும் நபரை காவல்துறை தேடி வருகிறது.

19 வயதான அந்த மாணவி மசூதியில் தனியாகத் தொழுகையில் ஈடுபட்டிருந்தபோது, மாலை சுமார் 4.45 மணியளவில் இந்தச் சம்பவம் நிகழ்ந்ததாக அலோர் காஜா காவல் துறை கண்காணிப்பாளர் அஹ்மத் அபு பக்கார் தெரிவித்தார்.

பணம், கைபேசி, தனிப்பட்ட பொருட்கள் மற்றும் முக்கிய ஆவணங்கள் அடங்கிய தனது கைப்பையை, பாதிக்கப்பட்ட மாணவி தனது தொழுகை விரிப்புக்கு முன்னால் வைத்தபோது, அருகில் அறிமுகமில்லாத ஒருவர் நிற்பதைக் கவனித்ததாக அபு பக்கார் கூறினார்.

நீல நிற டி-ஷர்ட் மற்றும் கருப்பு நிற கால்சட்டை அணிந்திருந்த அந்த சந்தேக நபர், திடீரென கைப்பையைப் பறித்துக்கொண்டு, பெண்கள் தொழுகைப் பகுதியின் பின்புற வெளியேறும் வழி வழியாகத் தப்பிச் சென்றார் என்று அவர் இன்று கூறினார்.

அன்றைய தினம் மாலை 6.24 மணிக்கு இந்தச் சம்பவம் குறித்து காவல்துறைக்குத் தகவல் கிடைத்ததாகவும், திருட்டுக் குற்றத்திற்காக தண்டனைச் சட்டத்தின் 380வது பிரிவின் கீழ் விசாரணைகள் நடத்தப்பட்டு வருவதாகவும் அவர் கூறினார்.

சந்தேக நபரின் அடையாளம் உறுதிசெய்யப்பட்டுள்ளதாகவும், அவரைக் கண்டுபிடித்துப் பிடிப்பதற்கான முயற்சிகள் நடைபெற்று வருவதாகவும் அவர் தெரிவித்தார்.

முன்னதாக, இந்தச் சம்பவம் தொடர்பான ஒரு காணொளிக் காட்சி சமூக ஊடகங்களில் வைரலானது!

Your email address will not be published. Required fields are marked *

முக்கிய செய்தி