முன்னாள் இராணுவத் தலைவர் & அவரின் இரு மனைவிகள் கைது!

Shan Siva
08 Jan, 2026

கோலாலம்பூர், ஜன 8: இராணுவ கொள்முதல் டெண்டர் திட்டம் தொடர்பான விசாரணையில், முன்னாள் இராணுவத் தலைவர் ஹஃபிஸுதீன் ஜந்தான் மற்றும் அவரது இரு மனைவிகளை மலேசிய ஊழல் தடுப்பு ஆணையம் (MACC) கைது செய்துள்ளது.

MACC தலைமை ஆணையர் தான்ஸ்ரீ அசாம் பாக்கி இந்த கைது நடவடிக்கையை உறுதிப்படுத்தியுள்ளதாக புல்லெட்டின் TV3 செய்தி வெளியிட்டுள்ளது.நேற்று மாலை 7 மணி நிலவரப்படி, முன்னாள் இராணுவத் தலைவர் மற்றும் அவரது இரு மனைவிகள் கைது செய்யப்பட்டுள்ளதாக அசாம் பாக்கி தெரிவித்தார்.

மேலும், 24 லட்சம் ரிங்கிட் தொகை தவறாக பயன்படுத்தப்பட்டதாக சந்தேகிக்கப்படும் வழக்கில், அதற்கு உடந்தையாக இருந்ததாக கூறப்படும் ஒரு தம்பதியரும் கைது செய்யப்பட்டனர்.

இந்த விசாரணையின் ஒரு பகுதியாக, ஹஃபிஸுதீன் ஜந்தான் நேற்று பிற்பகலில் புத்ராஜெயாவில் உள்ள MACC தலைமையகத்தில் நேரில் ஆஜரானார். இராணுவ கொள்முதல் ஒப்பந்தங்களில் கார்ட்டெல் செயல்பாடுகள் உள்ளதாக எழுந்த குற்றச்சாட்டுகள் தொடர்பாக இந்த விசாரணை நடைபெற்று வருகிறது.

கடந்த மாதம் பாதுகாப்புத் துறை அமைச்சர் டத்தோ ஸ்ரீ காலெட் நார்டின், ஹஃபிஸுதீன் ஜந்தானுக்கு ஆயுதப்படைத் தலைவராக (Armed Forces Chief) வழங்கப்பட இருந்த பதவி உயர்வு, ஊழல் குற்றச்சாட்டுகள் தொடர்பான விசாரணை காரணமாக ஒத்திவைக்கப்பட்டதாக தெரிவித்திருந்தார்.

இதனைத் தொடர்ந்து, இராணுவத் தலைவர் பதவி ஜனவரி 1 முதல் அமலுக்கு வரும் வகையில் அஸ்ஹான் ஒஸ்மானுக்கு வழங்கப்பட்டது.

மூத்த இராணுவ அதிகாரி ஒருவரின் மற்றும் அவரது குடும்ப உறுப்பினர்களின் வங்கிக் கணக்குகளில் “பெரும் அளவிலான பணப் பரிவர்த்தனைகள்” இடம்பெற்றதாகக் கூறப்படும் குற்றச்சாட்டுகளின் பின்னணியில், ஹஃபிஸுதீன் ஜந்தான் கட்டாய விடுப்பில் அனுப்பப்பட்டார்.

இந்த பணத் தொகைகள், இராணுவ ஒப்பந்தங்களை பெற்ற நிறுவனங்களின் கணக்குகளில் இருந்து மாற்றப்பட்டதாக சந்தேகிக்கப்படுகிறது.

இதற்கிடையில், 2023 ஆம் ஆண்டிலிருந்து தொடர்ந்து அதிக மதிப்புள்ள இராணுவ ஒப்பந்தங்களை பெற்றதாக கூறப்படும் 26 நிறுவனங்களின் உரிமையாளர்களையும் MACC விசாரித்து வருகிறது.

மேலும் நேற்று வழங்கல் மற்றும் பராமரிப்பு திட்டங்களைப் பெறுவதற்காக மூத்த இராணுவ அதிகாரிகளுக்கு லஞ்சம் வழங்கியதாக சந்தேகிக்கப்படும் 17 நிறுவன இயக்குநர்களை ஐந்து நாட்கள் remand-இல் வைக்க MACC நீதிமன்ற அனுமதி பெற்றது!

Your email address will not be published. Required fields are marked *

முக்கிய செய்தி