• THINAGAREN SANGGAREN
• 02 Jul, 2026

ஜூலை 2,

பெண்களுக்கான அங்கீகாரத்தை அரசியலில் தொடர்ந்து வழங்கி வரும் டி.ஏ.பியுடன் ம.இகாவை ஒப்பிட முடியாது என டி.ஏ.பியின் SKUDAI சட்டமன்ற வேட்பாளர் கார்த்தியாயினி தெரிவித்தார். ஜொகூர் மாநில டி.ஏ.பி தலைவரான தியோ நி சிங் தலைமையிலான டி.ஏ.பி மகளிர் பிரிவின் HERLEAD - பெண்கள் தலைமைத்துவப் பயிற்சித் திட்டத்தில் உருவாக்கப்பட்ட தலைவர்களில் பல பெண் அரசியல் தலைவர்கள் அடையாளம் காணப்பட்டுள்ளனர். அது போல டி.ஏ.பியில் அடையாளம் காணப்பட்டு தற்போது சட்டமன்ற வேட்பாளராகவும் நான் இருக்கிறேன் என SKUDAI வேட்பாளர் கார்த்தியாயினி தெரிவித்தார். ஆனால், பெண்களை அங்கீகரிக்கும் தனது பொறுப்பிலிருந்து ம.இ.கா விலகிவிட்டது. ஜொகூர் மாநிலச் சட்டமன்றத் தேர்தலில் பாரிசானின் ம.இ.கா பெண் வேட்பாளர்களுக்கு வாய்ப்பு வழங்காமல் புறக்கணித்திருக்கிறது. ஜொகூர் ம.இ.காவில் துடிப்பான, இளம் பெண்களும் இருப்பதை நான் அறிவேன். ஆனால் அவர்களில் ஒருவருக்குக் கூட ம.இ.கா வாய்ப்பு வழங்கவில்லை என கார்த்தியாயினி சாடினார்.


SKUDAI வேட்பாளர் கார்த்தியாயினியின் ஊடக அறிக்கை பின் வருமாறு!

பெண்களின் பிரதிநிதித்துவத்தில் ஜனநாயக செயல் கட்சி (ஜசெக) சொல்வதைச் செய்கிறது; மஇகா இன்னும் சிறப்பாகச் செயல்பட வேண்டும். "மாண்புமிகு தியோ நி சிங் தலைமையிலான ஜசெக மகளிர் பிரிவின் HERLEAD - பெண்கள் தலைமைத்துவப் பயிற்சித் திட்டத்தில் உருவாக்கப்பட்ட தலைவர்களில் ஒருவராக நான் இருக்கிறேன்." அனைவரையும் உள்ளடக்கிய அரசியலை நிலைநிறுத்துவதில் ஜசெக  எப்போதும் முன்னோடியாக இருந்து வருகிறது. இளம் வயதிலிருந்தே தனது தலைவர்களை உருவாக்கி, வழிநடத்தும் கட்சி அது என்பதில் நான் பெருமை கொள்கிறேன். தேர்தல் காலங்களில் பெண்களை வெறும் கண்துடைப்புக்கான வேட்பாளர்களாக ஜசெக ஒருபோதும் கருதியதில்லை. அதற்கு பதிலாக, மக்களுக்கு திறம்பட சேவை செய்யக்கூடிய தலைவிகளை அடையாளம் கண்டு, அவர்களை வளர்த்தெடுத்து, தலைமைத்துவத்திற்கு தயார்படுத்துவதில் கட்சி நீண்டகாலமாக நேரம், முயற்சி, வளங்களை முதலீடு செய்து வருகிறது.

அத்தகைய உறுதியான அர்ப்பணிப்பில் உருவான ஒருவராக இருப்பதில் நான் பெருமைப்படுகிறேன். ஜசெக மகளிர் பிரிவின் கீழ் மாண்புமிகு தியோ நி சிங் முன்னெடுத்த HERLEAD போன்ற முயற்சிகள் மூலம், ஏராளமான பெண்கள் தலைமைத்துவப் பொறுப்புகளை ஏற்க தேவையான திறன்கள், தன்னம்பிக்கை, வாய்ப்புகளைப் பெற்றுள்ளனர். தலைமை என்பது திறமை, தகுதி, அர்ப்பணிப்பின் அடிப்படையில் அமைய வேண்டும் என்ற நம்பிக்கையை ஜசெக கொண்டுள்ளது. அந்த நம்பிக்கை அதன் செயல்பாடுகளிலும் தெளிவாகப் பிரதிபலிக்கிறது. ஒரு பெண்ணாகவும், ஜொகூர் மாநிலத் தேர்தலில் போட்டியிடும் வேட்பாளராகவும், கட்சித் தலைமைத்துவம் என்மீது கொண்டுள்ள நம்பிக்கைக்கும் வழங்கப்பட்டுள்ள வாய்ப்பிற்கும் நான் மனமார்ந்த நன்றியைத் தெரிவிக்கிறேன். இது பெண்களை வலுப்படுத்துவது குறித்து ஜசெக வெறுமனே பேசுவதில்லை; அதை நடைமுறையிலும் செயல்படுத்துகிறது என்பதற்கான உறுதியான சான்றாகும்.

ஆனால், வருத்தத்திற்குரிய வகையில், இவ்வாறு மஇகா குறித்து கூற முடியாது. அனைவரையும் உள்ளடக்கும் அரசியல், இளம் தலைவர்களுக்கு வாய்ப்பளிப்பது குறித்து மஇகா அடிக்கடி பேசுகிறது. ஆனால் ஜொகூர் மாநிலத் தேர்தலுக்கான வேட்பாளர் பட்டியல் வெளியிடப்பட்டபோது, அதன் செயல்பாடுகள் அதன் பேச்சுடன் ஒப்பிடும்போது மிகவும் ஏமாற்றமளிப்பவையாக இருந்தன. ஜொகூரில் மஇகா ஒரு பெண் வேட்பாளரைக்கூட களமிறக்கவில்லை. அதைவிட வருத்தமளிப்பது என்னவென்றால், கட்சிக்காக நீண்டகாலமாக அர்ப்பணிப்புடன் உழைத்த அனுபவமிக்க தலைவிகளும் தகுதியான இளம் பெண் தொழில்முறை நிபுணர்களும், மக்களுக்கு சிறப்பாக சேவை செய்யும் திறனும் தகுதியும் இருந்தபோதிலும் புறக்கணிக்கப்பட்டுள்ளனர். இது ஒரு முக்கியமான கேள்வியை நம் முன் எழுப்புகிறது. கட்சிக்குள்ளும், சமூகத்திலும் தங்களது திறமையையும் சேவையையும் நிரூபித்த பெண்களுக்குக்கூட வாய்ப்பு வழங்கப்படவில்லை என்றால், பெண்களின் பிரதிநிதித்துவத்திற்கு மஇகா உண்மையிலேயே முன்னுரிமை அளிக்கிறது என்று எப்படி கூற முடியும்?

இறுதி வேட்பாளர் பட்டியலைப் பார்த்த பலரும், திறமையும் தகுதியுமே உண்மையில் தேர்வின் அடிப்படையாக இருந்ததா, அல்லது வேறு காரணிகளுக்கே அதிக முக்கியத்துவம் அளிக்கப்பட்டதா என்ற கேள்வியை எழுப்புகின்றனர். மலேசியாவின் மக்கள்தொகையில் பெண்கள் கிட்டத்தட்ட பாதியளவு உள்ளனர். எனவே, அரசியல் பிரதிநிதித்துவமும் அந்த நடப்பு நிலையைப் பிரதிபலிக்க வேண்டும். நாட்டின் எதிர்காலத்தை வடிவமைக்கும் முடிவுகளில் பெண்கள் அர்த்தமுள்ள பங்களிப்பை வழங்கவும் தலைமை ஏற்கவும் தீர்மானங்களை எடுக்கவும் உரிய வாய்ப்புகளைப் பெற வேண்டும். பெண்களின் திறமையை வளர்த்தெடுக்கவும், அவர்கள்மீது நம்பிக்கை வைத்து தலைமைப் பொறுப்புகளை ஏற்கும் வாய்ப்பை வழங்கவும் ஜசெக ஒருபோதும் தயங்கியதில்லை. வெற்று வாக்குறுதிகளுக்கும் அதை நிறைவேற்றுவதற்கும் உள்ள வேறுபாடு இதுதான்.

பெண்கள் தகுதியின் அடிப்படையில் உரிமையுடன் பெற வேண்டிய தலைமைத்துவ வாய்ப்புகளை உறுதிசெய்ய, அனைத்து அரசியல் கட்சிகளும், குறிப்பாக மஇகா, இனியாவது உறுதியான நடவடிக்கைகளை மேற்கொள்ள வேண்டும் என்று நான் எதிர்பார்க்கிறேன்.

கார்த்தியாயினி ஜெயபாலன்
வேட்பாளர்
N48 ஸ்கூடாய்