• Shan Siva
• 24 Sep, 2026

கோலாலம்பூர், செப் 24: பெரிகாத்தான் நேஷனல் (PN) கூட்டணியில் நிலவும் குழப்பத்தைக் குறிக்கும் வகையில், ஒரு காலத்தில் உச்சத்தில் இருந்த ஒருவரை பெயர் குறிப்பிடப்படாத சில தலைவர்கள் காட்டிக்கொடுத்துவிட்டதாக பெர்சாத்து (Bersatu) கட்சியின் உதவித் தலைவர் அகமது ஃபைசல் அசுமு இன்று குற்றம் சாட்டினார்.

இந்த நெருக்கடியால், தான் ஏமாற்றமும், கோபமும், அவமானமும் அடைந்துள்ளதாகவும், துரோகம் இழைக்கப்பட்டதாக உணர்வதாகவும் கூறிய ஃபைசல், இது தீவிர விளைவுகளை ஏற்படுத்தக்கூடும் என்றும் குறிப்பிட்டார்.

அந்தத் தலைவர் உச்சத்தில் இருந்தபோது, ​​நீங்கள் அவருக்குப் பணிந்து மரியாதை செலுத்தினீர்கள்; அனைத்து நன்மைகளையும் பகிர்ந்துகொண்டீர்கள்; அதிகாரத்தில் இருப்பதன் அனுபவத்தைப் பெற்றீர்கள்  என்று அவர் கூறினார்.

ஆனால், அந்தத் தலைவர் சரிவைச் சந்தித்தபோது, ​​நீங்கள் தலைக்கனம் கொண்டு நடந்துகொண்டதுடன், அளித்த வாக்குறுதிகளையும் மீறித் துரோகம் இழைத்தீர்கள்.

தங்கள் சொந்தத் தவறுகளை ஒப்புக்கொள்ள மறுத்துவிட்டு, பிரச்சினைகளுக்கு மற்றவர்களைக் குறை கூறுபவர்களையும் ஃபைசால் விமர்சித்தார்.

நான் மட்டுமே எப்போதும் சரி, மற்றவர்கள் எப்போதும் தவறு என்பது போல மற்றவர்களைக் குறை கூற வேண்டிய அவசியமில்லை. ஒருவேளை நீங்களும் அதே மனப்பான்மையைக் கொண்டிருக்கலாம்  என்று அவர் கூறினார்.

இந்த ஆண்டின் தொடக்கத்தில் பெர்சாத்து தலைவர் முகைதீன் யாசின் கூட்டணியின் தலைவர் பதவியிலிருந்து விலகும் முடிவை எடுத்ததைத் தொடர்ந்து PN-இல் நிலவும் பதற்றங்களுக்கு மத்தியில் ஃபைசாலின் இந்தக் கருத்துகள் வெளியாகியுள்ளன.

பிப்ரவரி மாதத்தில் PAS கட்சியின் உதவித் தலைவர் அகமட் சம்சுரி மொக்தார் PN-இன் தலைவர் பதவியை ஏற்ற சிறிது காலத்திலேயே பெர்சாத்து மற்றும் PAS கட்சிகளுக்கு இடையே கருத்து வேறுபாடுகள் ஏற்பட்டன.

தொகுதிப் பங்கீடு பேச்சுவார்த்தைகள், தேர்தல் உடன்படிக்கைகள் மற்றும் பெர்சாத்து ஓரங்கட்டப்படுவதாக எழுந்த குற்றச்சாட்டுகள் தொடர்பான ஆழமான கருத்து வேறுபாடுகளைத் தொடர்ந்து, PAS தலைமை ஒருதலைப்பட்சமாக இந்த உறவை முறித்துக்கொள்ளும் முடிவை எடுத்ததாக முகைதீன் முன்பு கூறியிருந்தார்.

அதன்பிறகு, PN-இன் முக்கிய உயர்மட்டக் கூட்டங்களிலிருந்து பெர்சாத்து ஓரங்கட்டப்பட்டது. இதனால், கூட்டணி விதிகள் மீறப்பட்டதாகக் கூறி சங்கங்களின் பதிவிலாகாவில் (RoS) அக்கட்சி அதிகாரப்பூர்வமாகப் புகார் அளித்தது.

இன்று முன்னதாக, PN-இன் பதிவை ரத்து செய்ய உத்தேசித்துள்ளதாகக் கூறி, அக்கூட்டணிக்கு RoS நோட்டீஸ் அனுப்பியதுடன், அதன் செயல்பாடுகளையும் இடைநிறுத்தியது; அதேவேளையில், அதற்கான காரணத்தை விளக்க PN-க்கு 30 நாட்கள் அவகாசமும் வழங்கப்பட்டது.

ஜூலை 16 அன்று நடைபெற்ற PN கூட்டம் தொடர்பாக பெர்சத்து அளித்த புகாரின் அடிப்படையில், 1966-ஆம் ஆண்டு சங்கங்கள் சட்டத்தின் கீழ் இந்த நடவடிக்கை எடுக்கப்பட்டதாக RoS தெரிவித்தது.

RoS-இன் இந்த நடவடிக்கைக்குப் பின்னால் அரசியல் அழுத்தம் இருப்பதற்கான சாத்தியக்கூறுகளைத் தங்களால் மறுக்க முடியாது என்று PN-இன் பொதுச் செயலாளர் தக்கியுடின் ஹசன் கூறினார்.

இந்த நடவடிக்கைக்கான அடிப்படையை PN ஏற்கவில்லை என்றும், முறையான சட்ட வழிமுறைகள் மூலம் கூட்டணி தன்னைத் தற்காத்துக்கொள்ளும் என்றும் தகியுடின் வெளியிட்ட அறிக்கையில் தெரிவித்தார்!