• Shan Siva
• 17 Dec, 2024

கோலாலம்பூர், டிச 17: தெங்கு ஜஃப்ருல் அஜீஸ் பிகேஆருக்குத் தாவக்கூடும் என்ற அம்னோவின் ஊகங்கள் மக்களை முட்டாளாக்கும் செயல் என்று பாஸ் தகவல் பிரிவுத் தலைவர் அஹ்மட் ஃபத்லி ஷாரி தெரிவித்துள்ளார். அது எல்லாமே நாடகம் என்று கூறினார்.

பிகேஆர் கட்சி பிரதமர் அன்வார் இப்ராகிம் தலைமையில் இருப்பதை அம்னோ அறிந்திருப்பதாக முகநூல் பதிவில் அவர் குறிப்பிட்டுள்ளார்.

எனவே அவர்களால் (அம்னோ) உண்மையில் அதிகமாக எதிர்ப்பு தெரிவிக்க முடியாது அல்லது ஆசிரியருக்கும் மாணவருக்கும் இடையிலான உறவை பாதிக்கும் அபாயம் உள்ளது என்று அவர் கூறினார்.

மேலும், பிற கட்சி உறுப்பினர்களை வேட்டையாடுவது பிகேஆருக்கு புதிதல்ல என்று ஃபத்லி கூறினார்.

2020 ஆம் ஆண்டில், சிலாங்கூர் சட்டமன்ற உறுப்பினர்கள் அமானாவை விட்டு வெளியேறி பிகேஆரில் இணைந்தனர். ஒரு வருடம் கழித்து, மற்ற மாநிலங்களில் இருந்து மூன்று அமானா சட்டமன்ற உறுப்பினர்களும் பிகேஆருக்கு தங்கள் கட்சியை விட்டு வெளியேறினர்.

தங்கள் சட்டமன்ற உறுப்பினர்கள் பிகேஆரால் வேட்டையாடப்பட்டதைப் பற்றி அமானா மிகவும் வருத்தமடைந்ததாக ஃபத்லி கூறினார்.

எனவே, இதுபோன்ற நாடகங்களைக் கண்டு பொதுமக்கள் ஏமாற வேண்டாம் என்று அவர் பதிவிட்டுள்ளார்.

அம்னோ மற்றும் பிகேஆர் திரைக்குப் பின்னால் தெங்கு ஜஃப்ருல் பிகேஆரில் இணைந்தது பற்றி விவாதித்துள்ளனர். எனவே, ஒருமைப்பாடு பற்றிய பேச்சுகள் வெறும் சொல்லாடல்கள்தான் என்று தெரிவித்துள்ளார்.

 தெங்கு ஜஃப்ருல் அம்னோவில் இருந்து விலகி பிகேஆரில் சேரத் திட்டமிட்டுள்ளதாக ஊகங்கள் பரவி வருவது குறிப்பிடத்தக்கது!